ټرانسپورټ وزیر د ملګرو ملتونو پرمختیایي ادارې د ټرافیکي برخې استازي سره وکتل
د افغانستان د اسلامي جمهوریت د ترانسپورټ وزیر ښاغلي انجنیر یما یاری د ملګرو ملتونو د پرمختیایي ادارې د ټرافیکي برخې استازي ښاغلی سرما سدها سره وکتل. په دې لېدنه کې د ښاري ټرافیکو په برخه کې، چې نوي د ولسمشرۍ مقام د حکم پر اساس د ټرانسپورټ وزارت تر تشکیلاتي چتر لاندې راغلي دي، پر اصلاحاتو او د هغو د خدماتو پر موثریت خبرې وشوې.
د ټرانسپورټ وزیر وویل، چې تر یوه چتر لاندې راتلو د ټرانسپورټ د ټولو برخو لپاره واحده لارنقشه ترسیم کړه او دا د ملي یووالي حکومت مهمه لاسته راوړنه ده. نوموړی د ټرافیکو د اصلاحاتو او خدماتي موثریت په برخه کې د ملګرو ملتونو د پرمختیایي ادارې د پروژو او منابعو په اړه د یادې ادارې له استازي مالومات په جزییاتو واورېدل او خپلو اړوندو همکارانو ته یې لارښوونه وکړه، چې په د ملګرو ملتونو له پرمختیایي پروګرام سره د ټرافیکي اصلاحاتو او خدماتي موثریت په اړه په نوې طرحه شوې برنامه کې له نژدې همغږي او کار وکړي.
په دې لېدنه کې د ټرانسپورټ په برخه کې د ولسمشر سلاکار فرید احمد مومند هم ګډون درلود.